D’Editioun 2025 ass d’Resultat vun enger kollektiver an demokratescher Organisatioun tëscht verschiddenen Acteuren, déi sech fir eng méi participativ an engagéiert Gesellschaft asetzen.

Si gëtt ëmgesat vum CePAS, dem Zentrum fir politesch Bildung (ZpB), der Nationaler Schülerkonferenz (CNEL), dem Jugendrot, dem Service des droits de l’enfant vum Ministère fir Educatioun, Kanner a Jugend (MENEJ), der Agence pour le développement de la qualité dans les secteurs de l’Enfance et de la Jeunesse (ADEQSEJ), der Generaldirektioun du Secteur de l’Enfance, der Generaldirektioun de l’Enseignement fondamental an dem Kannermusée PLOMM.

All dës Partner droen aktiv zur Konzeptioun, Koordinatioun an Ëmsetzung vun den Aktivitéite vun der Woch bäi.

Service des droits de l’enfant (SDE)

De Ministère fir Educatioun, Kanner a Jugend koordinéiert d’Woch vun der Demokratie iwwer säi Service des droits de l’enfant, d’Direction Générale du Secteur de l’Enfance, d’Direction Générale de l’Enseignement fondamental an de CePAS.

De Service des droits de l’enfant garantéiert d’Ëmsetzung vun der Internationaler Kannerrechtskonventioun a Kollaboratioun mat de verschiddene Ministèren, Institutiounen an Organisatiounen, déi mat dëser Missioun beoptraagt sinn.

Hie mécht och bei interministerielle Koordinatiounen an den Aarbechte vun internationalen Organer mat, déi d’Konventioune kontrolléieren, déi Lëtzebuerg am Beräich vun de Kannerrechter ratifizéiert huet, an déi den Austausch vu gudde Praktike fërderen, déi um nationale Plang iwwerholl kënne ginn.

A Partnerschaft mat privaten Organisatioune erstellt de Service Guiden, Referenzdokumenter souwéi Sensibiliséierungsaktiounen a Campagnen.
Seng Aarbecht baséiert op de véier Grondprinzippie vun der Kannerrechtskonventioun :

• Non-Diskriminatioun ;
• D’Wuel vum Kand ;
• D’Recht op Iwwerliewen an Entwécklung ;
• D’Recht op Participatioun.

Agence fir d’Entwécklung vun der Qualitéit an den Enfance- a Jugendsecteuren (Agence Qualitéit)

D’Agence fir d’Entwécklung vun der Qualitéit an den Enfance- a Jugendsecteuren (am Weidere Agence Qualitéit genannt) bitt eng strukturéiert, innovativ a kollaborativ Approche, fir d’Qualitéit an de Secteure Kandheet, Jugend an Hëllef fir Kanner a Familljen nohalteg ze stäerken.

D’Agence Qualitéit handelt iwwer dräi komplementar Achsen:

Begleedung vun de Strukturen
D’Qualitéitsberoder:innen vun der Agence ënnerstëtzen d’Strukturen an hire Qualitéitsprozesser duerch eng individualiséiert Begleedung, ouni Kontrollmissioun.

Berufflech Weiderentwécklung
D’Agence koordinéiert eng Offer u Weiderbildungen a Coaching, déi vu spezialiséierten Organismen entworf a geleet ginn, an déi sech un de beruffleche Realitéiten an de Besoinen um Terrain orientéieren.

Pedagogesch Innovatioun
Iwwer den Tiers-lieu LumiQ ënnerstëtzt d’Agence d’Co-Kreatioun, d’Experimentatioun an d’Entwécklung vun innovativen Projeten, déi um Terrain entstinn – a Kooperatioun mat den Acteuren aus de betraffene Secteuren.

Mat hirem Handelen dréit d’Agence Qualitéit zur Weiderentwécklung vun de praktesche Methoden an der Professionaliséierung vum Secteur bäi – mat enger Perspektiv vu gedeelter a nohalteger Transformatioun.

Zentrum fir politesch Bildung

Den Zentrum fir politesch Bildung (ZpB) ass eng onofhängeg Fondatioun, där hir Missioun et ass, d’Biergerschaft ze fërderen, andeems si eng besser Versteesdemech vun der Demokratie an de gesellschaftlechen Erausfuerderungen vun haut erméiglecht. E spezielle Fokus läit op dem Engagement vu Kanner a Jugendlechen, och wann den ZpB sech un déi ganz Bevëlkerung riicht.

Ënnert dem Motto « Demokratie léieren a liewen » begleet den ZpB Kanner, Jugendlecher an Erwuessener dobäi, politesch Mechanismen, Prozeduren a grondleeënd demokratesch Prinzippie kennenzeléieren. D’Zil ass et, dës Konzepter konkret an accessibel ze maachen an sou d’demokratesch Kultur an der Schoul, an der non-formaler Bildung an an der Gesellschaft am Allgemengen ze stäerken.

Den ZpB encouragéiert eng aktiv Biergerbildung a steet fir eng lieweg a participativ Demokratie an. Och dëst Joer organiséiert den ZpB – a Kollaboratioun mam Ministère fir Educatioun, Kanner a Jugend – d’Konferenz « Meng Stëmm, Mäin Impakt – Kanner schwätze mat! », déi den 28. Oktober 2025 stattffënt.

Op hirer Websäit www.zpb.lu fannt Dir didaktescht Material fir ze consultéieren oder erofzelueden, ugepasst un dei verschidden Zilgruppe am Kader vun der Woch vun der Demokratie, souwéi all Detailer zur pädagogescher Offer an eisem Agenda.

Jugendrot

Gegrënnt an den Ufanksjoere vun de 1960er ënner dem Numm Conférence Générale de la Jeunesse Luxembourgeoise (CGJL asbl), ass de Jugendrot den Daachverband, deen déi verschidde Jugendorganisatiounen am Grand-Duché vereenegt.

Seng Membere kommen aus villerlee Ëmfeld: politesch Beweegungen, Gewerkschaften, Scout- a Guide-Beweegungen, soziokulturellen a sozioedukative Beräicher, mee och aus dem Fräizäitsecteur. Mat engem breede Spektrum vu 35 Memberorganisatioune vertrëtt de Jugendrot / CGJL d’Stëmm vun de Jonken – national wéi och international.

• Formatiounen ;
• Encadrementservicer fir de Jugendparlament an den CNEL (Conférence Nationale des Elèves) ;
• d’Organisatioun vum Rallye Citoyen an der Jugendkonventioun ;
• Informatiouns- a Sensibiliséierungscampagnen ;
• Ronndëschgespréicher a Konferenzen iwwer demokratesch Prozesser an aktiv Biergerschaft.