D’Editioun 2026 ass d’Resultat vun enger kollektiver an demokratescher Organisatioun tëscht verschiddenen Acteuren, déi sech fir eng méi partizipativ an engagéiert Gesellschaft asetzen.

Si gëtt vum CePAS, dem Zentrum fir politesch Bildung (ZpB), der Conférence nationale des élèves du Luxembourg (CNEL), dem Jugendrot, dem Service fir d’Rechter vum Kand vum Ministère fir Educatioun, Kanner a Jugend, der Agence pour le développement de la qualité dans les secteurs de l’Enfance et de la Jeunesse (ADEQSEJ), der Generaldirektioun vum Kannerberäich, der Generaldirektioun vum Fondamental an dem Kannermusée PLOMM ëmgesat.

Jidderee vun dëse Partner bedeelegt sech aktiv un der Planung, der Koordinatioun an der Ëmsetzung vun den Aktivitéite vun der Woch.

Service des droits de l’enfant (SDE)

De Ministère fir Educatioun, Kanner a Jugend koordinéiert d’Woch vun der Demokratie iwwer säi Service des droits de l’enfant, d’Direction Générale du Secteur de l’Enfance, d’Direction Générale de l’Enseignement fondamental an de CePAS.

De Service des droits de l’enfant garantéiert d’Ëmsetzung vun der Internationaler Kannerrechtskonventioun a Kollaboratioun mat de verschiddene Ministèren, Institutiounen an Organisatiounen, déi mat dëser Missioun beoptraagt sinn.

Hie mécht och bei interministerielle Koordinatiounen an den Aarbechte vun internationalen Organer mat, déi d’Konventioune kontrolléieren, déi Lëtzebuerg am Beräich vun de Kannerrechter ratifizéiert huet, an déi den Austausch vu gudde Praktike fërderen, déi um nationale Plang iwwerholl kënne ginn.

A Partnerschaft mat privaten Organisatioune erstellt de Service Guiden, Referenzdokumenter souwéi Sensibiliséierungsaktiounen a Campagnen.
Seng Aarbecht baséiert op de véier Grondprinzippie vun der Kannerrechtskonventioun:

• Non-Diskriminatioun;
• D’Wuel vum Kand
• D’Recht op Iwwerliewen an Entwécklung;
• D’Recht op Participatioun

Agence fir d’Entwécklung vun der Qualitéit an den Enfance- a Jugendsecteuren (Agence Qualitéit – AQUEN)

Déi nei Agence fir Qualitéitsentwécklung an de Beräicher Kanner a Jugend (AQUEN) begleet d’Fachleit aus de verschiddene Beräicher vun der non-formaler Bildung bei der kontinuéierlecher Qualitéitsentwécklung.

D’AQUEN baut op de Fortschrëtter op, déi säit 2016 am Beräich vun der Qualitéitssécherung an der Qualitéitsentwécklung am Secteur vun der non-formaler Bildung gemaach goufen – engem Beräich, deen eng wesentlech Roll fir d’Entwécklung an d’Entfalung vun de Kanner a Jugendleche spillt. Si stellt de Fachleit an hire Strukturen hir Expertisen zur Verfügung, fir si bei engem kontinuéierleche Verbesserungsprozess ze begleeden an déi qualitativ Weiderentwécklung vum Secteur ze ënnerstëtzen.

D’Qualitéitsagence wëll déi néideg Begleedung ubidden, fir gutt Iddien a konkret Projeten ëmzesetzen, déi och fir aner Strukturen nëtzlech kënne sinn. Déi bescht Léisunge fir de Secteur entstinn do, wou Kanner a Jugendlecher am Alldag begleet ginn.

An dësem Sënn wëll d’Qualitéitsagence an Zesummenaarbecht mat allen Acteuren um Terrain:

• d’Qualitéit an de Strukture mat Hëllef vun de QUALITÉITSBERODER weiderentwéckelen;
  
• d’Innovatioun duerch den Innovatiounsraum vun der AQUEN, LUMIQ – Liicht op Innovatioun a Qualitéit, fërderen an opwäerten;
• d’Fachleit duerch den nationale Formatiouns-, Coaching- a Prozessbegleedungsdispositif vu PLATTFORM stäerken.

Zentrum fir politesch Bildung

Zanter 10 Joer ass den Zentrum fir politesch Bildung (ZpB) eng onofhängeg Stëftung, där hir Missioun et ass, d’Biergerschaft ze fërderen, andeems si e bessert Verständnis vun der Demokratie an den aktuelle gesellschaftlechen Erausfuerderungen erméiglecht. Dobäi leet den ZpB e besonnesche Schwéierpunkt op den Engagement vu Kanner a Jugendlechen, riicht sech awer un déi ganz Bevëlkerung.

Ënnert dem Motto « Demokratie léieren a liewen » begleet den ZpB Kanner, Jugendlecher an Erwuessener dobäi, politesch Mechanismen, Prozeduren a grondleeënd demokratesch Prinzippie kennenzeléieren. D’Zil ass et, dës Konzepter konkret an accessibel ze maachen an sou d’demokratesch Kultur an der Schoul, an der non-formaler Bildung an an der Gesellschaft am Allgemengen ze stäerken.

Den ZpB encouragéiert eng aktiv Biergerbildung a steet fir eng lieweg a participativ Demokratie an. Och dëst Joer organiséiert den ZpB – a Kollaboratioun mam Ministère fir Educatioun, Kanner a Jugend – d’Konferenz « Meng Stëmm, Mäin Impakt – Kanner schwätze mat! ».

Op der Websäit www.zpb.lu fannt Dir didaktescht Material fir ze consultéieren an erofzelueden, dat un déi verschidden Zilgruppe vun der Woch vun der Demokratie a vun der Citoyenneté ugepasst ass, souwéi all d’Detailer iwwer déi pedagogesch Offer an eisem Katalog.

Jugendrot

Gegrënnt an den Ufanksjoere vun de 1960er ënner dem Numm Conférence Générale de la Jeunesse Luxembourgeoise (CGJL asbl), ass de Jugendrot den Daachverband, deen déi verschidde Jugendorganisatiounen am Grand-Duché vereenegt.

Seng Membere kommen aus villerlee Ëmfeld: politesch Beweegungen, Gewerkschaften, Scout- a Guide-Beweegungen, soziokulturellen a sozioedukative Beräicher, mee och aus dem Fräizäitsecteur. Mat engem breede Spektrum vu 35 Memberorganisatioune vertrëtt de Jugendrot / CGJL d’Stëmm vun de Jonken – national wéi och international.

Seng Offer ëmfaasst:

• Formatiounen,
• Encadrementservicer fir de Jugendparlament an den CNEL (Conférence Nationale des Elèves),
• d’Organisatioun vum Rallye Citoyen a vun der Convention des Jeunes,
• Informatiouns- a Sensibiliséierungscampagnen,
• Rondëschgespréicher a Konferenzen iwwer demokratesch Prozesser an aktiv Biergerschaft.